जेनजी आन्दोलनपछि सभापति देउवाले आफू राजनीतिबाट विश्राम लिने भन्दै पूर्णबहादुरलाई कार्यवाहक सभापति सुम्पिएका थिए । तर केही समयपछि महामन्त्रीद्वय गगन थापा र विश्वप्रकाश शर्माले विशेष महाधिवेशन गरेर नयाँ नेतृत्व चयन गरे । त्यससँगै कांग्रेसमा अनौपचारिक विभाजन आएको थियो । इतर पक्षको नेतृत्व पूर्णबहादुरले गरिरहेका थिए ।
निर्वाचन आयोग र अदालतले समेत गगनले नेतृत्व गरेको कांग्रेसलाई वैधानिकता दियो । सोपश्चात इतर पक्षका थुप्रै नेताहरूले गगनबाट टिकट लिएर चुनावमा भाग लिए । खड्काले पनि टिकट पाएनन्/लिएनन् । इतर पक्षबाट चुनाव लडेका सबैजसो पराजित भए । चुनावमा कांग्रेसको नतिजा निराशाजनक भएपछि इतर पक्षले समानान्तर गतिविधि गर्दै आएको छ ।
पछिल्लो समय नेता खड्का भने समानान्तर गतिविधिको पक्षमा नरहेको निकट स्रोत बताउँछ । उनी अहिले राष्ट्रिय भेला गर्नेमा पनि सहमत थिएनन् । उनी पन्छिएपछि भेलाको संयोजक शशाङ्क कोइरालालाई बनाइएको हो । त्यसयता कोइराला नै इतर पक्षको नेता बनेका छन् । आज समापन हुने भेलाले १५ औँ महाधिवेशन आयोजना गर्ने निर्णय गरेको छ । यसको पनि संयोजन गर्ने जिम्मेवारी शशाङ्कलाई दिइएको छ ।
स्रोतका अनुसार पूर्णबहादुर भने पार्टी विभाजनको पक्षमा छैनन् । पार्टीको आधिकारिताबारे दायर भएको मुद्दामा अदालतले पुनरावलोकनको आदेश दिएको हुँदा त्यसको फैसला पर्खिनुपर्ने उनको राय छ । तर इतर पक्षका अधिकांश नेताहरूले भने धैर्यता गुमाइसकेका छन् ।
भेलाको पहिलो दिन खड्का सहभागी भएका थिए । उनले भाषण पनि गरे । आफ्नो भाषणमा उनले देउवाकै नेतृत्वमा कांग्रेसलाई एकताबद्ध बनाउनुपर्नेमा जोड दिएका थिए । स्रोतका अनुसार त्यस दिन पनि खड्का भेलामा जान इच्छुक थिएनन् । भर्खर विदेशबाट फर्किएका पूर्वसभापति देउवाले निको नमान्लान् भनेर उनी गइदिएको स्रोतले बतायो । अब खड्का इतर पक्षले गर्ने समानान्तर गतिविधिमा संलग्न नहुने स्रोतको दाबी छ ।
