कोशी प्रदेश सरकारले प्रदेश लोक सेवा आयोगको सदस्य पदमा दुई जना नियुक्त भएका छन्। कोशी प्रदेश सरकारको सिफारिस बमोजिम प्रदेश प्रमुख परदेश खापुङले बिहीबार विहान विराटनगर–३ निवासी रूप थापा ओझा र मोरङको उर्लाबारी–५ निवासी भीमबहादुर सुव्बा (फुदोङ) लाई आयोगको सदस्य पदमा नियुक्त गरेका हुन्।
कोशी प्रदेश सरकारका मुख्यमन्त्री हिक्मतकुमार कार्कीको संयोजकत्वमा गठित समितिले प्रदेश लोक सेवा आयोग ऐन, २०७६ दफा ३ को उपदफा (५) बमोजिम उनीहरूलाई सदस्य पदमा नियुक्तिका लागि सिफारिस गरेको थियो ।
नवनियुक्त सदस्यहरूलाई प्रदेश लोक सेवा आयोगका अध्यक्ष महेन्द्रप्रसाद गुरागाईंले प्रदेश प्रमुख खापुङको उपस्थितिमा बिहीबार पद तथा गोपनीयताको शपथ गराएको प्रदेश प्रमुखको कार्यालयका प्रवक्ता नारायणप्रसाद भट्टराईद्वाराले जानकारी गराए ।
प्रतिक्रिया जनाउनुहाेस्
