काठमाडौँ । नेपाली कांग्रेसका नेता अर्जुननरसिंह केसीले पार्टी यथास्थितिमा जनतामा जान नसक्ने बताएका छन्। उनले अहिलेको विधि, पद्धति र अनुहार लिएर कांग्रेस जनताको बिचमा स्थापित हुन नसक्ने दाबी गरेका हुन्।
शनिबार पदाधिकारी र पूर्वपदाधिकारीको बैठकका लागि पार्टी केन्द्रीय कार्यालय सानेपा पुगेका नेता केसीले अहिलेको विधि र पद्धतिमा व्यापक परिवर्तन गर्न जरुरी रहेको बताए। उनले युवा पुस्ताको धारणालाई प्रतिनिधित्व गरेर अघि बढ्नुको विकल्प नरहेको भन्दै युवाहरूलाई हरेक तहमा प्रतिनिधित्व गराउनुपर्नेमा जोड दिए।
नेता केसीले भने, ‘म आफैँ पनि युवाहरूले हरेक तहमा प्रतिनिधित्व गर्नुपर्छ भनेर बोलेको मान्छे हुँ। भोलि पनि केन्द्रीय समितिमा भन्छु। ऊर्जाशील समूहलाई न्यूनतम रूपमा पनि सहभागी गराउनुपर्छ। समग्र रूपमा युवा पिँढीको धारणा नै प्रतिनिधित्व गर्न सकेनौँ भने हामी वास्तवमा जनताको बिचमा स्थापित हुन सक्दैनौँ।’
उनले ऊर्जाशील समूहलाई अब पनि पार्टीका हरेक तहमा सम्मानजनक सहभागिता नगराए कांग्रेसले ठुलो मूल्य चुकाउनुपर्ने चेतावनीसमेत दिएका छन्। उनले थपे, ‘अहिलेकै यथास्थितिमा, अहिलेको विधि, पद्धति र अनुहार लिएर हामी जनताको बिचमा जान सक्दैनौँ। यसमा व्यापक परिवर्तन जरुरी छ।’
