काठमाडौं । संघीय संसद्, राष्ट्रिय सभामा महिला समन्वय समिति गठन भएको छ। समितिको संयोजकमा रेणु चन्द र सचिवमा सम्झना देवकोटा चयन भएका छन्।
राष्ट्रिय सभाकी उपाध्यक्ष लिला कुमारी भण्डारीको विशेष उपस्थितिमा महिला समन्वय समिति गठन तथा समितिको कार्यविधि–२०८३ पारित भएको हो।
संघीय संसद्, राष्ट्रिय सभा नियमावली, २०७५ (दोस्रो संशोधन) को नियम २३२(ङ) बमोजिम २०८३ जेठ १७ गते गठन भएको यस समितिले संविधान तथा कानूनप्रदत्त महिला अधिकार सुनिश्चित गर्न, लैङ्गिक समानता कायम गर्न तथा सामाजिक न्याय प्रवर्द्धन गर्न प्रभावकारी भूमिका खेल्ने उद्देश्य राखेको छ।
समिति बढीमा नौ सदस्यीय रहनेछ। संयोजक र सचिव सामान्यतया प्रत्येक वर्ष चयन गरिने व्यवस्था रहेको छ।
समितिले लैङ्गिक सवालमा एकीकृत धारणा निर्माण गर्ने, अध्ययन–अनुसन्धान गर्ने, क्षमता अभिवृद्धि गर्ने तथा संघ, प्रदेश र स्थानीय तहसँग समन्वय गर्ने लगायतका कार्य गर्नेछ।
